Лясы прыціхлі і палі,
Нібыта перад навальніцай.
А-а, вунь і хмары напаўзлі,
Пускаюць джалы-бліскавіцы.
Знянацку вецер схалануў
Траву, кусты, загойдаў голле,
І дождж наўскоса паласнуў
Па пацямнелым наваколлі.
І загуло, і зараўло,
І безгалоўе застагнала,
І хмары чорнае крыло
Глынула сонца, жах нагнала.
Калі ж прайшла вады сцяна
І зацвілі вясёлкі-стужкі,
Закрасавалася вясна,
Зашчабяталі звонка птушкі.
Зіхцела сонца на расе,
Было і весела, і шумна,
Раскрылі вочкі краскі ўсе,
А я стаяў і думаў сумна:
Над светам іншы гром чуваць,
Ствараем і маланкі-джалы,
І страшныя лёсапавалы,
Каб, перажыўшы ўсё — спяваць.