Рабіў, што мог...
Ды і зрабіў што мог.
Што можна ўзяць яшчэ
з жыцця майго?
Цяпер мне, сэрца падкажы
Ці Бог —
Куды ісці? Імкнуцца да чаго?
Жыццё — цішэй, цішэй,
ледзь ловіць слых,
Палёт душы —
усё ніжэй, ніжэй.
Ці шмат дадаць магу
ў апошні штрых,
Які мне папярэдніх даражэй?
Такой праблемы раб —
не я адзін,
Пры развітанні
кожны з ёй знаём:
Галоўны клопат,
каб апошні блін
Не стаў у горле твораў камяком.