Надыдзе хутка развітанне
І не паспею азірнуцца...
Маё апошняе жаданне —
З нашчадкамі не размінуцца.
Каб быў ён запатрабаваны
І ў час пазасучасны, новы,
Мой жывапісны, вершаваны,
Мой празаічны том жыццёвы.
Інакш — жыццё не адбылося
І будзе, позна альбо рана
Душы бязмежнай шматгалоссе
У доле часу пахавана.
Святое твораў прызначэнне —
Прайсці праз «моды», час, нягоды,
Каб словы, як вясной насенне,
Пусцілі ў будучыні ўсходы.