Жыццё — вялікі цуд,
жыццё — вялізны боль,
І як тут разабраць,
чаго ў ім будзе болей?
Напэўна, ўсё-ткі ёсць
ад некага кантроль —
Спачатку сонца больш,
а потым — болю.
Жыццё — духоўны ўзлёт,
жыццё — падзенне ў грэх.
Тут бездані,
Вышыні,
Далі,
Шыры.
Падзенне і узлёт...
Што ніз для нас?
Што — верх?
Арыентыры, дызарыентыры?
Жыццё — маленькі век,
жыццё — вялікі міг,
З якіх сузор’е свеціцца
Над светам.
Жыццё — не для злачынстваў,
жыццё — не для інтрыг —
І ўсё ж яно атручваецца гэтым.