«Падтрымліваць таленавітых трэба,
Бяздарныя праб’юцца самі ўсе...»
Высакародныя намеры.
Я — за!
За таленты ва ўсім!
Жыву я з гэтым, поўны веры,
Што дапамога будзе ім.
Так яно й ёсць!
За свае справы,
Таленавітыя ўвесь час,
Падтрымку маюць ад дзяржавы,
Пашану шчырую ад нас...
Ёсць, пэўна, людзі-невідзімкі,
Як непачуты ёсць матыў.
Я ж без ніякае падтрымкі,
Без званняў розных штось зрабіў.
Жыву я без надзеяў марных,
Бо вунь ён, зеўрыць хуткі дол.
Няўжо калісьці да бяздарных
Мяне далучыць пратакол?