Каб падскочыць,
Адштурхнуцца трэба,
Хай сабе й не даляціш
Да неба,
А ў паветры будзеш
хоць імгненне,
Зведаеш, адкуль яно,
Натхненне.
Каб падскочыць...
Можна пнуцца й пнуцца,
Ад пустога
Век не адштурхнуцца,
Не ўзляцець з пустога
Ні на ёту,
Вельмі шмат патрэбна
Для узлёту.
Сэрцам трэба быць
Ў бацкоўскай хаце,
Трэба помніць
калыханку маці
І любіць
Свой родны кут адзіны,
Не ўяўляць сусвету
Без Радзімы.
І яшчэ —
Для ўзлёту неабходна
Жыць духоўна,
Светла,
Богаўгодна,
І дзяліцца ад душы
З усімі
Творчымі здабыткамі
Сваімі.
Да ўсяго —
Дадам яшчэ умову:
Родную ў палёт
Бярыце мову,
Каб уславіць ёю
Край наш мілы,
А інакш —
Душы аслабнуць крылы.