Як важна зразумець незразумелае,
Паўстаўшае сцяною між людзей.
І з сэрца свету схлыне набалелае,
І будзе свет хварэць усё радзей.
Наперад крок — адказ на невядомае,
І мысленне глыбей ад веку ў век,
Бо ісціна жыцця — жыццё свядомае,
А чалавецтва — кожны чалавек.
Трагедый землятрусы да ускраінаў
Перыядычна коцяць па зямлі.
Стагоддзямі чагосці не хапае нам —
Паразумення так і не знайшлі.
Вайна, знішчэнне — і жыццё няўтульнае,
А шар зямны — дарунак, не мішэнь.
Агульны дом Зямля, і усё агульнае —
І смутак ночы, і жыцця агмень.