Светлай памяці брата Косціка
Што ажывала прад вачамі брата
У час апошні перад вечным сном?..
Маленства?
Голь?
Карпілаўская хата
З асінай трапяткою за акном?
Бацькі?
Браты?
Свая сям’я?
Каханне?
Паэзія ў юнацкія гады?
Грыбная старасць?
Рыбацтва?
Паляванне?
Ці боль ад адыходу назаўжды?
Ён паміраў без скаргаў,
У бязгуччы,
І чуў, напэўна, памінальны звон...
Мне на яго глядзець было балюча,
Хоць пра «балюча»
Ведаў толькі ён...