Чэрвень дорыць нам
Пачатак лета.
Як жа не любіць яго
За гэта?
Чэрвень шмат для нас
Дзівосаў знойдзе —
Самы доўгі дзень
У ім на годзе,
Самы знамянальны дзень
Для школаў —
Выпуск вучняў,
Сумны і вясёлы,
Развітальны баль —
Ён будзе сніцца...
Чэрвень дорыць
Смачныя суніцы
Пакаштуеш —
Пальчыкі абсмокчаш.
Кожны дзень частуйся,
Калі хочаш.
Вунь, лугоў
Духмянае шматквецце —
Як прыемна
Шчыраваць у леце!
Чэрвень — месяц
Сонечны і зорны...
Але ёсць у ім
І самы чорны
Дзень яго —
Дваццаць другі па ліку,
Страшны дзень
Трагедыі вялікай.
Але чэрвень тут
Не вінаваты,
Што былі
І ёсць на свеце каты,
Што на ранак
Мірны і прыгожы
Наступіў раптоўна бот варожы.
Чэрвень быў заўсёды
Сябрам шчырым,
Будзь жа ты навекі,
Чэрвень, мірным!