У палітры жыцця
чорны колер нікому не трэба,
Чорны колер, ён лішні,
непатрэба усіх непатрэб.
Хтосьці можа спытацца —
а як нам без чорнага хлеба?
І адказ будзе просты:
— Ці ж ёсць у жыцці чорны хлеб?
«Чорны» хлеб мáе колер
грачышнага мёду,
«Чорны» хлеб мае колер загару
хлебаробавых рук,
«Чорны» хлеб мае колер
ураджайнага кожнага году,
Калі ёсць умалот —
сто цэнтнераў, не меней, на круг.
Я не ведаю што,
можа чорнае быць у прыродзе,
Нават у гругана —
не, не чорнае, з сінім крыло.
Праўда, чорная зайздрасць —
чамусьці завецца ў народзе,
Колер чорны ў жалобы,
ды лепш бы яе не было.