Прыемнасць... Непрыемнасць —
спалучэнне.
Антаганісты — ўсё ж прымай, трывай.
Хачу заўсёды чуць: —
Да пабачэння!
І не жадаю чуць прысуд: — Бывай.
Ды чорна-беласць
па жыцці — радамі,
Падзеі перамешваюць «рады».
І ўсе ж «бывай» часцей гучыць з гадамі —
«Бывай» услед камусьці —
назаўжды.
«Жыццё», «каханне» —
словы-аздабленні,
Яны, як крылы з-за падзеяў-плеч...
Я сёння ўсім кажу: —
«Да пабачэння!
Да новых светлых святаў!
Да сустрэч!»