Каб не сагнуцца, трэба быць сталёвым,
Каб не зламацца, трэба мяккім быць,
Не вораг гільяціна безгаловым,
Халоднакроўны — а душа гарыць.
І гэта ўсё, ёсць доказы, не чуткі,
Я ў іх пераканаўся, сколь жыву.
Ў жыцці сталёвым трэба быць і гнуткім,
Гарэць душой, захоўваць галаву.
Як разабрацца ў вінігрэце гэтым?
Калі быць мяккім, а калі, як сталь?
Як годна жыць перад сабой і светам?
Пытанняў шмат, адказаў менш, на жаль.