Зара на шчочках,
Іскаркі у вочках,
Дарослая
Руплівасць у гульні...
Дзіцятка з шуфлікам
штось ладзіць у пясочку.
Ты — промнік светлы
ў нашай мітусні.
Зірнуць табе б
у будучыню з сёння,
А з будучыні —
ў гэты светлы дзень
Заўважыць ты змагло б,
як лёсу промні
Святлом адорваюць
і утвараюць цень.
З пясочніцы твой шлях —
у казку мараў,
У быль станоўчых
і ліхіх падзей.
А колькі будзе
сонечнасці й хмараў,
Здзяйсненняў
І няздзейсненых надзей.
Шлях па жыцці
цікавы і суровы
Па ім —
Уперад толькі, не назад.
Лёс будзе
чорна-белы і ружовы
І ад цябе
залежыць будзе шмат.
Шлях па жыцці —
выпрабаванняў школа,
Па ім ты мусіш
да канца прайсці.
Ты у маленстве —
пад крылом анёла,
Будзь пад аховай Бога
У жыцці.