Дзень беларускага пісьменства —
Святкуй, літаратурны свет!
Для душ духоўных — набажэнства,
Для бездухоўных душ — фуршэт.
Людзей, людзей! На тое й святы,
Каб шэрасць будняў забяліць.
У кожнага настрой прыўзняты —
Ёсць чым цікаўнасць наталіць.
Кнігарні, кірмашы, буфеты,
І песні, й танцаў карагод.
Тут — і святочныя газеты,
І дух даўно мінулых год.
А вось — на сцэне выступоўцы
З раёну, вобласці й вышэй.
І дораць прывітання слоўцы —
Мёд для душы і для вушэй.
Чыноўнікі людзей вітаюць,
Уладныя гаваруны,
Хоць кніг ні пішуць, ні чытаюць,
Ды тут — галоўныя яны.
Пісьменства — свята!
Адназначна!
І нездарма шматлюдна тут...
А дзе ж пісьменнікі? Не бачна!
А-а — вунь! Адсунутыя ў кут.