Прыйшоўшы ў свет недасканалы гэты,
Недасканалы сам і непісьменны,
Амаль усе я скончыў факультэты
Свайго жыцця, набыўшы скарб бясцэнны.
Я вывучаў маленства залатое,
Я грыз навуку — спасцігаў юнацтва.
У сталасці заўжды шукаў героя,
З якім ва ўсім я марыў параўнацца.
Давалася ўсё весела, з імпэтам —
Знаёмствы, прэзентацыі, здзяйсненні,
Тварыў з вясеннім, летнім факультэтам,
Не мала спраў адолена з асеннім.
Жыццё ўсё кліча й кліча: — Калі ласка!
Ды ўсё далей, далей світанак ранні.
Апошні факультэт даецца цяжка,
Ён крэсліць і жыццё, і намаганні.