Філасофія жыцця —
Зачарованая багна,
Шлях адвечны адкрыцця,
Да цябе цягнуўся прагна.
Лез у існасць белых плям,
Таямніц выламваў дзверы —
І жыцця ружовы храм
Набываў адбітак шэры.
Праўда — горкая. Яна
Выядае многім вочы.
І ліслівая мана
Зноў з уладай побач крочыць.
Дабрыня — усё танней,
Жорсткасць — вокладка штодзёння,
Бедны — з кожным днём бядней,
Злодзей — норма міжзаконня.
Чалавек — пылінка, нуль,
Старасць — у нагах ануча.
Хто мы? Для каго? Адкуль?
Мы не ведаем. Зноў — нуль.
Крыўдна, сорамна, балюча.
У жыццё ідзе дзіця —
У ружовы храм без стуку...
Філасофія жыцця —
Вельмі жорсткая навука.