Не ўсе зямныя справы
Я завяршыць паспеў...
Баюся не расправы,
Мне крыўдна, Божа правы —
Не ўсё сказаць паспеў.
Зноў за ўсмешку-шыльду
Хаваю ўласны плач.
Баюся, што за крыўду
Не ўсім сказаў: — Прабач!
Не ўсім надзейным словам
І справай дапамог.
Учынкам выпадковым
Кагосьці раніць мог.
Грызе туга сляпая —
Яшчэ б пажыць, пажыць.
І часу не хапае
Ўсе справы завяршыць.
Няздзейсненая мэта
Ў канцы жыцця — дакор.
І ў кожным сэрцы гэта —
Галоўнае не спета.
Чакае лепшы твор.