Я ўсе пытанні ўплёў
ў адно пытанне,
Каб атрымаць за раз
на ўсё адказ.
Адказ на ўсе пытанні — ратаванне,
Якое праўдай ці ўратуе нас?
Бывае праўда горай самасуда,
А самасуд не паляпшае свет.
Ці ўратаваў адказ каго,
што Йуда
Ісусу здрадзіў з-за пустых манет?
І свет разумны не прыдумаў сродку,
Які ад нас пытанне адхіне:
Ці мы ідзём у іншы свет да продкаў
З павагай да сябе?
Ці ўсё-ткі не?