Юнацкая пара палоскаю зары
Чароўны дзень жыцця распачынае.
Наперадзе гады, як дні ў календары,
Спрасованы — жыццё іх разлістае.
Дарога без канца — ідзеш, а далягляд
Міражыць, вабіць абысці планету.
З усіх бакоў вясна, цвіце, буяе сад —
Адрозніць восень цвет ад пустацвету.
І мой ручай душы крынічнасцю бруіць,
Імкнецца ў белы свет незамутнёна.
Гармонія жыцця — жывое прагне жыць
І марыць, і глядзіць на ўсё ўлюбёна.
Гармонія жыцця, юнацтва чысціню,
Святло і цень былое спалучае.
Я гэта ўсё прайшоў, я гэта сёння сню,
Ды позна зразумеў — за што сябе й віню:
Прыстаўка «дыз» гармонію знішчае.