Баба Сцепаніда цыравала дзедаву кашулю і ўголас разважала:
— Адкуль гэткі холад наскочыў? Яшчэ ж толькі пачатак кастрычніка, а ўчора снег залятаў... Не падабаецца мне гэта...
Дзед Яўхім супакоіў жонку:
— Не хвалюйся, будзе яшчэ цёпла, будзе... Вунь, дрэвы лісця не скінулі і сабака качаўся па зямлі, а гэта — на цяпло.
— А як не будзе цёпла? — не сунімалася старая.— А як маразы жарнуць?
— Ну няхай сабе жарнуць! — спакойна пасля чарговай зацяжкі адказаў дзед.
Сцепаніда адклала ўбок сваю работу і не на жарт занепакоілася:
— Як гэта, няхай жарнуць?! А часнок?.. Мы ж яшчэ не паторкалі ў зямлю зімавы часнок!
Дзед стаяў на сваім:
— Рана яшчэ часнок садзіць! Жыццё дажываем, а ў гэткую пару ніколі не садзілі яго.
— Яно-то так... але, для надзейнасці, уключы тэлевізар, паслухаем прагноз надвор’я.— І старая зноў узялася за цыраванне.
Дзед зірнуў на гадзіннік і хуценька паклыпаў да тэлевізара.
І сапраўды, дыктар з экрана абвясціў, што пасля рэкламнай паўзы будзе паведамленне Гідраметцэнтра.
Баба чарговы раз прыпыніла свой занятак і, каб лепей чуць, выткнула з-пад хусткі вуха. Дзед таксама падсунуў бліжэй да тэлевізара табурэтку.
Нарэшце пасля рэкламных пракладак і «блендамедаў» пачулася жаданае:
«Слухайце паведамленне Гідраметцэнтра: у наступныя двое сутак надвор’е ў нашай рэспубліцы будзе вызначаць цыклон, які рухаецца са Скандынавіі, з цэнтрам над Балтыкай. Пры сустрэчы двух атмасферных франтоў, халоднага і цёплага паветра, поўнач Еўропы і поўдзень Азіі закране перыферыйная цыкланічная дэпрэсія, аднак пад націскам антыцыклона, які набліжаецца з боку Атлантыкі, з цэнтрам над Грэцыяй, цыклон, з дыстрафічнымі наступствамі і павышаным атмасферным ціскам, што небяспечна для сталых людзей, а таксама астматыкаў і гіпертонікаў, паступова пакіне зону няўстойлівага супрацьстаяння і перамесціцца ў накірунку першапачатковага знаходжання, адкуль будзе ўплываць на далейшае надвор’е Блізкага Усходу і сумежнага з Беларуссю Захаду. Атмасферны ціск будзе на працягу двух дзён то павышацца, то паніжацца, аднак не пакіне межаў ртутнага слупка, што паспрыяе Казярогам, Блізнятам і Стральцам.
Каб атрымаць больш дакладную інфармацыю аб надвор’і, звяртайцеся да нашага сайта: тры даблю, кропка, ру, працяжнік і тры коскі...
А зараз зноў рэкламная паўза...»
Старыя разгублена пераглянуліся.
— Ты што-небудзь зразумеў? — спыталася старая.
Дзед збянтэжыўся:
— Не з нашай адукацыяй слухаць разумныя перадачы!
— А што ўсё ж рабіць з часнаком? — яшчэ больш разгубілася баба.
— Што ты да мяне прычапілася? — раззлаваўся дзед Яўхім.
— А да каго мне чапляцца? — не стрымалася баба.
— Чула? Звяртайся да нейкага Сайта! — рашуча адрэзаў дзед і выключыў тэлевізар.