Ратуйцеся, хто можа! Пацяпленне!
Глабальнае! Сусветнае! Канец!
Каго палоніць жах, каго — здзіўленне —
Хто ісціну вяшчуе? Хто ілжэц?
Вядзецца дыспут вочны і завочны,
І кожны хоча сэрца закрануць:
Два палюсы — паўднёвы і паўночны,
Усё, што паміж імі — паглынуць!
А за спіною дыспутаў вучоных
Грымяць тэракты, вісне смерці цень.
І колькі іх, ахвяраў незлічоных,
На ўсёй планеце множыць кожны дзень?
Ратуйся! Пацяпленне! Канец свету! —
Валтузяць, рвуць адзін і той жа гуж.
Ды цень другой бяды накрыў планету —
Глабальнае пахаладанне душ.