Прыйшоў да гаспадыні
Госць у госці,
Яна яму — цудоўны суп пад нос.
— У гэтым супе не хапае штосьці! —
Ён лыжку пераборліва абтрос.
— У ім жа лісцік, перчык,
соль і кропчык,—
Сказала Гаспадыня —
ўсё ў ім ёсць.
— А, можа, ёсць салоны агурочак? —
На дзіва смачна аблізнуўся Госць.
Ледзь не зляцелі з яе вуснаў слоўкі:
«От ўжо пераборлівы які...»
Яна схадзіла моўчкі у кладоўку,
Й прынесла на талерцы агуркі.
А Госць зазначыў
Гаспадыне важка,
Якая стала ля яго, як слуп:
— А каб да гэтых агурочкаў пляшку,
Вось гэта быў бы
найсапраўдны суп!