Беларус я, бульбаш,
Без утайкі кажу.
На базар, на кірмаш,
Сваю бульбу вязу.
Бульбу танна прадам,
А прыгожай жанцы
За усмешку аддам,
Не сярдуйце, людцы.
Не пускайце слязу,
Не сумуйце наўздых.
Я яшчэ прывязу,
Хопіць бульбы на ўсіх.
Суайчыннік-бульбаш,
Бульбу ў печы вары
І таўчы яе й смаж,
І для бабкі дзяры.
І пячы у агні,
Каб дымілася аж.
І мяне памяні —
Беларус я, бульбаш
Назаўсёды я ваш
І карміцель, і друг.
Беларус я, бульбаш,
Я працую за двух.
Гаспадар тлустых глеб,
Беларускіх палёў.
Наш другі, смачны хлеб,
Ў свеце славу знайшоў.
І вядзерца вага,
І мяшэчык вага,
І да бульбы маёй
Не спадае чарга.
Мáю гонар спрадвек,
Што на бульбе узрос,
Што на ёй чалавек
Не прынізіў свой лёс.
Дый на бульбе мой стаж —
Шмат працоўных гадоў.
Беларус я, бульбаш,
І няма лепшых слоў.