Плыве птушыны сум у вырай з Беларусі
І развітальны плач злятае з-пад нябёс,
А я і ў халады тут сынам застануся —
З табой, мая зямля, у нас адзіны лёс.
Апошні свой уздых аддам табе, мой краю.
Каб толькі ўратаваць надзею ад бяды.
Я нарадзіўся тут і жыць тут гонар маю,
Дзяліць с табой святло і змрочныя гады.
Я не сыду ў нябыт! Я песняю вярнуся
Убачыць, як з жыцця знікае смутку цень,
Як сонца узыйшло над вольнай Беларуссю
І крылы разгарнуў пад сонцам новы дзень.
Плыве птушыны сум у вырай з Беларусі
І развітальны плач злятае з-пад нябёс,
А я і ў халады з Радзімай застаюся —
З табою, Беларусь, у нас адзіны лёс.