Мне не пашанцуе, я вярнуўся,
А вяртанне — дрэнная прыкмета.
Я ў сваё былое акунуўся,
Я сваім мінулым ахінуўся —
Лёс смяротным не даруе гэта.
Можна жыць загульна, без аглядкі,
Ды, на жаль, жыццёвы век кароткі.
Перад тым, як легчы «на лапаткі»,
Я імкнуўся не да вас, нашчадкі,
Я душой з мінулым, з вамі, продкі.
Пачыналі вы жыцця аповесць,
Я пішу працяг, бо сэрца чуе —
Перарвецца з днём мінулым повязь,
Дзень наступны гэта не даруе.
Я хачу зірнуць былому ў вочы —
Я вярнуўся, каб наперад крочыць.