Мы з вамі — плынь адной ракі,
Зямлі адной усходы,
Мой край Лагойскі, землякі,
Я з вамі назаўсёды.
Тут першы раз пасля вайны
Пабег у школку босы.
Тут стужка першай баразны
І першыя пракосы.
Тут першы горкай солі пуд
Сышоў з гарачым потам.
Надзеі, мэты, мары тут
Спяліў, каб здзейсніць потым.
Збылося штосьці, штосьці не,
Свой лёс судзіць не будзем,
Галоўнае: не брыдка мне
Глядзець у вочы людзям.
У вашы вочы, землякі,
Дзе шчырасць і спагада.
Мы з вамі — плынь адной ракі.
Імчыць якая праз вякі
За далеч далягляда.