Я не ўваскросну, я не Ісус,
Я не святы.
Я — памяркоўны, я беларус,
Як ты і ты.
Я не ўваскросну, Ісусе наш,
Бо я — жывы
Ніхто не зробіць адтуль «віраж»,
Ні я, ні вы.
Адзін памерлы быў сярод нас,
Жывей жывых.
Ды высвятляецца праз час —
Ён не з святых.
Я не ўваскросну, на тое ёсць
Святы канон.
Што б ні казалі, тут кожны «госць»,
Як я і ён.
З надзеяй кожны «да неўспадзеў»
Свой крыж нясе.
Мы не ўваскроснем, каб хто й хацеў,
Як я і ўсе.