Я на гэты юбілей да брата
Не дамоў прыехаў — на клады.
Ах, які б быў сёння стол багаты,
Каб не ўседазволенасць бяды.
Як бы, Косцік, віншаваў цябе я!
Як бы славазвоніў ты ў адказ!
Сёння толькі гэта думка грэе,
А сляпой трагедыі завея
Вые, стогне болем паміж нас.
Думкамі з табой стаю ў абдымку
Тут, дзе вечнасць, дзе твой вечны сон.
Свет пусты — і ты на фотаздымку,
Ды і той, скрозь слёзы, зыбкі ён.
Фотаздымак кратаю халодны,
Гаркату ўспамінаў сумна п’ю.
З круглым юбілеем, брат мой родны —
Незапрошаны я тут стаю.
15.02.2018