Спі, маленькае дзіцятка,
Спі, прыемна ў снах лунаць.
У дзяцінстве больш парадку —
Не спяшайся падрастаць.
З кожным годам перамены
Й нас мяняюць і псуюць —
Ненажэрлівыя цэны
Не кусаюць, а грызуць.
А пакуль табе не трэба
Ведаць, што і да чаго.
Шлях цяжкі да свайго хлеба
І кутка ў жыцці свайго.
Спі, дзіцятка, толькі ў сне ты,
У малечым — вольны птах.
Падрасцеш — і прайдзісветы
Звузяць крылаў вольны ўзмах.
Ты — з сям’і сумленнай, шчырай,
У сумленных — лёс цяжкі,
Бо на шалях лёсаў «гіры» —
Бессумленныя праныры
І ўсялякія дзялкі.
Падрастай, дзіця, няспешна —
Схопіш ласку ад вярхоў.
Спі, анёлік мой бязгрэшны
Ты з’явіўся ў свет грахоў.