Прыемна завітаць
Хоць да кагосьці
У вольны час
Ды пачасаць язык.
Тым больш, што быў
Запрошаны я ў госці,
Сабраўся і —
Гатовы быў, як штык.
Я ў тых людзей
Не быў яшчэ ні разу,
І вырашыў
Не збэсціць этыкет —
Таму і нагрузіўся
Да адказу:
Шампанскае,
Каньяк
І руж букет.
Ішоў я гасцяваць
І сэрца пела,
За загароджай вунь,
Катэджа гмах.
Але я ля ўваходу
Стаў нясмела
І халадком прабег
Па нервах страх.
О-о, ў гэты двор
Ужо ніхто не зойдзе,
І я прыйсці у госці
Не змагу,
Бо надпіс папярэджваў
На ўваходзе:
«Сабака злосны
На кітайскім ланцугу!»
Тут бачу небяспеку
Адназначна,
Таму сеў на траву я
Без тугі —
Каньяк глынуў,
Запіў шампанскім смачна,
Прыйду,
Калі ланцуг будзе другі.