Прыемна —
Па жыцці самааддана,
Калі ёсць мэта,
да яе ісці.
Том дапісаць
не так ужо й складана,
Цяжэй —
Апошнюю старонку у жыцці.
Прыемна сябраваць
надзейна, важка,
Калі у душах —
шчырасці праз край.
Развітвацца
Пасля сустрэчы цяжка,
Цяжэй сказаць
апошняе «Бывай!»
Як цяжка першы раз
сказаць: «Кахаю!»,
Але, бывае,
Пачуццё міне.
Тады каханне
сумна дагарае
У больш цяжкі́м,
кароткім слове «Не...»
Лягчэй... Цяжэй...
Няпростыя лічылкі —
І хто з іх
больш балюча б’е пад дых?
Мы ўблытваемся
з лёгкасцю ў памылкі,
І з цяжкасцю
Выблытваемся з іх.
Жыццё, яно —
матэрыя жывая,
То прыцемак,
То золкасць,
То святло...
Калі ў жыцці
ўсё лёгка не бывае,
Дык не дай Бог,
каб цяжка ўсё было.