Маўчанне — золата...
Маўчанне — згода...
Карысці больш,
каб менш яго было
У ім прысмак
і гарчыні, і мёду,
Утойвае дабро яно і зло.
Ў маўчанні —
падазронасці карэнні
І розных думак
сховішча сляпых.
У ім — ўзаеманепаразуменні,
Запазухаю камень для другіх.
Замоўкнуць музы —
у гармат натхненне,
Святая ісціна у гэтым ёсць.
А што рабіць,
калі маўчыць сумленне?
Трагедыі тады —
нярэдкі госць.
Спачатку што было?
Канешне, слова!
З душы і да душы —
масток яно.
Для ўсіх людзей
яно невыпадкова —
У зносінах галоўнае звяно.