Творчы вечар «Тытана»...
Проч усіх і ўсяго,
Я на вечар пазваны,
Як калега яго.
Псеўданім гэткі гучны
Выбраў ён, як маяк,
Хоць і піша дакучна
Абы што й абы як.
Выступленні паросіць
Будуць там лізуны
Будуць тое узносіць,
Ў што не вераць яны.
Не адзін там эпітэт
Захлынецца ў хвальбе.
Ды і сам з апетытам
Ён ухваліць сябе.
*
Ісці ці не ісці —
задачу вырашаю,
Хоць ведаю,
дзе дрэвы, а дзе пні.
Ды чую, як мяне
канапа запрашае:
— Ты лепей
Адпачні ад мітусні...
— Магу пацвердзіць я,
цікавага там мізер,
Духоўнага —
Увогуле там нуль. —
Раптоўна падтрымаў
канапу тэлевізар,
— Нятворчым
І хаўрусным тхне адтуль...
*
Я іду ўсё ж на вечар
І з душы скінуў груз,
Бо у кожнай сустрэчы
Ёсць і ў мінусе плюс.