Мне бы ўсіх вас абняць,
дарагія салдаты,
Вас, пакуль што жывых,
паміж жорсткіх баёў.
Мне бы ўсіх вас падняць,
хто ляжыць ля гарматаў
Ці ў акопах, ці ў полі,
канец свой знайшоў.
Мне ўпрасіцца б у вашу
сям’ю франтавую,
Хоць на колькі баёў,
на кароткі хоць час.
Мне бы з вамі адчайна
пайсці ў штыкавую,
Можа б смерць абмінула
хоць некага з вас.
Мне бы з вамі ў разведку
пайсці на заданне,
Мне б адчуць перамогі
хвалюючы міг...
Колькі б я ні глядзеў
пра вайну на экране,
Столькі сэрца імкнецца
быць там, між сваіх.