Закон прыроды?.. Mo беззаконне?..
Ланцуг харчовы — у ім і мы.
Чужая кроў і плоць — на коне,
І смерць...
Закон — глухі, нямы.
Хто ж так прыдумаў? Калісьці? Дзесьці?
Хто з «быць — не быць»
абраў «не быць»?
Каб жыць — кагосьці трэба з’есці,
Загрызці, разадраць, забіць.
Штодзень, штовек —
драпежны танец,
Адна арбіта — віток, віток.
Наш Бог — не вегетарыянец...
Зноў кіпцюры не ўпусцяць шанец,
Зноў для клыкастых —
крыві глыток.
О, я — дзівак! Шкадую птушку,
Зайца, казулю, мураша.
За грош і нас бяруць на мушку,
Жыццё — не варта і граша.