Вы бачылі, як прабівае
травінка асфальт?
Асфальт для зямлі, для травы,
для расліннасці — гвалт.
Асфальт для зямлі, для травы,
для расліннасці — краты,
Пад ім пахаваныя
кволага парастка святы.
Абрынуўся на чалавецтва
прагрэс-дабрадзей
І мёртвай скарынкай
зямлю аддзяліў ад людзей.
На мёртвай скарынцы
усё ж зелянеюць газоны —
Са штучнай і мёртвай травы
гэты насціл зялёны.
І ўсё-ткі жыццё ад жыцця
не аддзеляць ніколі —
Вунь, нават травінка прабілася
мужна з няволі,
Да сонца прабілася
скрозь рукатворнае бедства —
Як гэта падобна
на лёсы людзей, чалавецтва.