Прыязджае ў Беларусь замежжа —
Ў Беларусі любяць гасцяваць.
— Прыгажосць — жыцця вяршыня, вежа,—
Ад гасцей наехаўшых чуваць.
Маладыя й сталыя мужчыны
Кажуць смачна ўслых праз «ваў» ды «гут»:
— Самыя прыгожыя жанчыны
Толькі ў Беларусі!
Толькі тут!
Мужыкоў мясцовых памяркоўнасць
Не здзівіла гэта «навіна».
Мы пра беларусак, іх чароўнасць,
Без замежжа ведаем здаўна.
Мы нацыянальны скарб жаночы
За багацці ўсе не аддадзім.
— Так што не вылуплівайце вочы,
Замяжоўцы!
Так і скажам ім.