Нам, пакаленню сумленнаму,
Ваеннаму, пасляваеннаму,
Дзякуй сказаць не ляніцеся,
Мы адыходзім — схіліцеся.
Мы, Беларусі адданыя,
Не на грашах ўзгадаваныя,
Святадушою — сакральныя,
Мы — дабрынёй унікальныя.
Нас не хапаць будзе гэтаму,
Жорсткаму, інтэрнэтнаму,
Свету, шмат зла прытуліўшаму,
Арыенціры згубіўшаму.
Ўсё, што маглі, намі здзейснена —
Памяць не будзе закрэслена,
Бо недарэмна патрачана
Наша жыццё — наша спадчына.