Можна ўсё навучыцца рабіць —
Граблі, сані, машыну, ракету...
Але як навучыцца любіць?
Як напоўніць рэальнасцю мэту?
Нелюбоў — як зараза ў крыві,
Як у шклянцы вады — лыжка перцу.
І штодня не хапае любві
І зямлі, і былінцы, і сэрцу.
І знішчаецца годнасць людзей,
Ад спагады — да жорсткасці змены.
І лютуе наш век-ліхадзей,
І узводзіць нянавісці сцены.
Ад здзічэлых, замшэлых садоў
Шмат чарвівасці — мала карысці...
Як вярнуць нашым сэрцам любоў?
Дзе знайсці з ачарсвеласці выйсце?