Я пішу й на рускай мове,
А чаму б і не?
Тут таксама, ў кожным слове,
Частачка мяне.
Для духоўнасці каштоўны
Розных моў Парнас.
Я вучыўся ў рускамоўнай
Школе у свой час.
Тое ўсё — маё «учора»,
Я яго мінуў.
Безліч беларускіх твораў
Потым я «глынуў».
Ды галоўнае багацце
Меў штодзённа я —
Мова таты, мова маці,
Й вёсачка мая.
Імі даадукаваны
Я на ўсе гады.
Роднай мове я адданы,
Што да рускай — я з пашанай,
І ў тым няма бяды.