Нябёс бяздонне, акіянаў сінь
У параўнанні з ім — усё ж дзіця.
Найбольшая з вядомых велічынь —
Апошні міг свядомага жыцця.
Ён высветліць падзеі, час і нас
З народзін да канца, дзе долу край.
Дае магчымасць нам апошні раз
Паслаць жыццю апошняе «бывай».
Імчаць гады, не прытрымаеш іх,
Усіх адно чакае — не сакрэт.
Пражыў стагоддзе, а, здаецца,— міг.
А што сказаць ў канцы жыцця пра тых,
Хто маладым пакінуў гэты свет?