Віднее. Ціха. Дня пачатак.
У раніцы ружовасць шчок.
Над лесам аблачынак статак,
Над імі — месяц-пастушок.
Святло псуе яго браваду,
Знікае ён з вачэй зямлі.
І аблачынкі без дагляду,
Адчулі вольнасць, паплылі.
Пачатак дня, ён параўнальны
З жыццём, нацэленым у свет.
Ён і бадзёры, і запальны,
І поўны сіл, і поўны мэт.
Пачатак дня, як спраў дыспетчар,
Плануе, рупіцца, гудзе,
Бо ведае — надыдзе вечар
Й пачатак ночы прывядзе.