Каляднай ночы
з ноччу салаўінай
Не параўнаць,
Як старасць-маладосць.
Не параўнаць
Калыску з дамавінай,
Хаця між імі
Падабенства ёсць.
Дзіця ў калысцы —
дарог жыццёвых многа,
Расці,
Жыві,
Любую выбірай.
Нябожчыку — апошняя дарога
Ў сваёй «калысцы» —
У пекла або рай.
Ёсць паміж імі розніца —
Без слова,
Не толькі ў тым,
Што паміж іх гады.
Дзіцятка —
У калысачцы часова,
Нябожчык —
Ў дамавіне назаўжды.
Зноў
Падабенства крайнасцяў адчулі
Праз калыханку —
Праўда, з гарчынёй:
Дзіцятку закалыхвае
Матуля,
Нябожчыка —
Магіла цішынёй.