Нягучных твораў ціхімі радкамі
Вам прапаную гэты Божы дар,
Каб вы, хаця б маленькімі глыткамі,
Пілі маёй паэзіі нектар.
Каб хмарнасць засталася за спіною,
А ўсмешкам стала цесна на зямлі,
Каб вы адчуць вясёлкавасць настрою
І сонечнасць свайго жыцця маглі.
Паэзія, вы, я, вясна, каханне,
Тут будзе ўсё ў радках і паміж іх.
Галоўнае — душы з душой спатканне
І ўвасабленне мар усіх сваіх.