У «парку пісьменнікаў»,
парку адзіным у свеце,
Тут творчасці дух
і духоўнасці водар жыве,
Збіраецца моладзь
гуляюць дарослыя, дзеці,
У небе блакітным
задумлівы бусел плыве.
Паэты, празаікі,
творцы сучасных рэалій,
Высаджвалі дрэвы,
паказвалі працы узор.
Аддана, натхнёна
і дружна свой парк закладалі,
Нібыта пісалі
свой лепшы, прачулены твор.
І парк атрымаўся
утульны і вельмі удалы.
У ім Багдановічу з Коласам —
наша любоў.
У ім і душа
бессмяротнага Янкі Купалы,
Душа папярэднікаў творчых
мінулых часоў.
Улетку й зімою
сюды запрашаюць алеі,
Падораць гасцінна
сваю прахалоду і цень.
Тут чуюцца вершы
спраўляе жыццё юбілеі,
Тут кожны прыгожы
сваёй непаўторнасцю дзень.
І вольна тут марыцца,
пішацца светла і плённа,
І парк вас прытуліць
у радасці, і у журбе.
«Пісьменнікаў Парк»
прапануе сяброўства штодзённа,
У ім адчуваеш
часціцай Радзімы сябе.