Знакаміты акцёр
ці пісьменнік вядомы,
Захварэў, памірае —
хутчэй ратаваць!
Лекі, сродкі ўсе кінулі,
вывелі з комы,
І хваробы, як кажуць,
нідзе не чуваць.
Не павінен у горы
застацца ніводны —
Хоць цэнтрыст, камуніст,
партакрат, дэмакрат.
Як жа правільна гэта
і высакародна,
Усе роўныя
перад табой, Гіпакрат...
Бог па-свойму
для кожнага ладзіць гасцінец,
Шчодра дорыць дабро,
не шкадуе і зла.
Вось старая бабуля,
ў вясковай глыбінцы,
Ад хваробы сваёй
знемагла і злягла.
Узгадавала дзяцей,
падсабляла і ўнукам,
І у горы, і ў шчасці
з Радзімай была.
Ўсё жыццё на зямельцы
гарбаціла крукам,
Працавала на ёй
ад цямна да цямна.
Старасць рэшткам гадоў
абнуліла ліміты
І хвароба руплівасць
вывальвае з рук...
Колькі з’еў той пісьменнік
й акцёр знакаміты
Хлеба ўзрошчанага
з-пад бабуліных рук?
Ёсць вядомыя — людзі
І ёсць — чалавекі,
(Што з пустога ў парожняе пераліваць?)
Для бабулі не кінулі
сродкі і лекі,
Каб яе, спрацаваную,
уратаваць.