Апісваю сучаснасць
Чорнай тушшу,
Бо іншых колераў
не бачу на зямлі.
З бязрадасным
Суіснаваць я мушу,
Калі ўжо радасці ў нябыт сыйшлі.
Душа без ласкі —
побач з неласкавым,
Без крылаў творчасць —
творчасць не мая.
Маўчаннем размаўляю з нецікавым,
З няшчырасцю —
Пра шчырасць мару я.
Быў у сяродку,
апынуўся з краю,
І ўсё такі
Не звузіўся мой свет.
Я не стаю —
Шукаю і шукаю,
Шукаю, дзе і ў чым
жыцця сакрэт?