Настаў руплівы верасень.
— Прайшлі,
Прайшлі канікулы!
Крычалі недзе ўверсе
Узрушаныя кнігаўкі.
— Прайшлі,
Прайшлі канікулы!
Крычалі ўверсе ластаўкі,
Дзяцей у школу клікалі
Прыветна, як настаўнікі.
І хітавачкі кволыя
Зазыўна ў небе пікалі,
Над дахамі, над школамі:
— Прайшлі,
Прайшлі канікулы!
Ляцела сумна з вышыні:
— Прайшлі,
Прайшлі канікулы!..
Ці не сябе ўвесь час яны
Ў далёкі вырай клікалі?