Так сёння ёсць,
так будзе,
так было —
Хвалюе ўсіх адвечнае пытанне:
Хто атрымае верх —
дабро ці зло?
Хто пераможа
у процістаянні?
Дабро з усмешак створана,
з святла,
Яно навідавоку —
вочы ў вочы.
А зло драпежна
сочыць з-за вугла,
Каб у спіну ударыць
сярод ночы.
Я свята верыў —
возьме верх дабро,
Бо як інакш?
Інакш жыццё — няўдача.
Лавіў жар-птушку,
падабраў пяро —
Няўдача — скача,
а ўдача — плача.
Зло пракладае чорныя сляды
Па душах, па гісторыі,
па марах.
Дабро перамагае
не заўжды,
Бо й сонца веліч свой
губляе ў хмарах.
Маланка — зло,
а нас пужае гром,
І вестка — зло,
калі яна благая.
Жыццё — дабро....
Павінна быць дабром —
І ўсё-ткі смерць
яго перамагае.