Мой сум, як ноч,
цямнюткая да рання,
Мой сум, нібыта
пахмурныя дні.
Прыйдзі, як ратаванне,
як каханне,
Святлом прыйдзі
і цемру разгані.
Прыйдзі —
Як ратавальная ідэя,
Калі вакол
тупік на тупіку.
Прыйдзі —
Як неўміручая надзея,
Як дзіўны сон,
які заўжды ў руку.
Прыйдзі!
Прашу душэўна і прачула,
Прыйдзі
Праз перашкоды і бяду.
Калі ж маё «прыйдзі»
ты не пачула,
Праз перашкоды ўсе
я сам прыйду.